కోర్టుల్లో కేసులు వేసి ఉద్యోగాల భర్తీని అడ్డుకుంటున్నరు

పదేళ్ల పాటు గ్రూప్‌ - 1 నోటిఫికేషన్‌ ఇవ్వని వాళ్లు ఈ రోజు కోర్టుల్లో కేసులు వేసి ఉద్యోగాల భర్తీని అడ్డుకుంటున్నారని సీఎం రేవంత్‌ రెడ్డి అన్నారు. అలాంటి వారిని ప్రశ్నించాలని సూచించారు. సోషల్‌ వెల్ఫేర్‌ గురకులాల విద్యార్థులకు బుధవారం హైదరాబాద్‌ లో అవార్డులు ప్రదానం చేశారు. ఈ సందర్భంగా సీఎం మాట్లాడుతూ, ఈరోజు తెలంగాణ వైతాళికుడు సురవరం ప్రతాప రెడ్డి జయంతి అని.. ఆయన స్ఫూర్తిని కొనసాగించేందుకు తెలుగు యూనివర్సిటీకి ఆయన పేరు పెట్టుకున్నామన్నారు. మహిళా యూనివర్సిటీకి వీరనారి చాకలి ఐలమ్మ పేరు పెట్టుకున్నామని ప్రజల కోసం పని చేస్తే వాళ్లలాగే చరిత్రలో నిలిచిపోతారన్నారు. కులంతో ఎవరికి గుర్తింపు రాదని చదువుతోనే గుర్తింపు వస్తుందన్నారు. 

నెహ్రూ, అంబేద్కర్‌ ఆశయాలను కాంగ్రెస్‌ పార్టీ కొనసాగిస్తుందన్నారు. అట్టడుగు వర్గాలు అత్మన్యూనత భావాన్ని వీడాలని.. దానిని తొలగించేందుకే యంగ్‌ ఇండియా రెసిడెన్షియల్‌ స్కూల్స్‌ ఏర్పాటు చేశామన్నారు. బీఆర్‌ఎస్‌ బర్రెలు, గొర్రెలు, చేపపిల్లల వంటి స్కీములు ఇచ్చిందే తప్ప చదువు చెప్పించి రాజ్యాధికారంలో భాగం చేయలేదన్నారు. తమ ప్రభుత్వం వచ్చిన తర్వాత ఇప్పటి వరకు 59 వేల ఉద్యోగాలు భర్తీ చేశామన్నారు. విద్యార్థులు 25 ఏళ్లలోపు బాగా చదువుకొని ఉన్నత స్థితికి చేరాలన్నారు. ఈ వయస్సులో తప్పుదారిపడితే తలదండ్రులు తలదించుకునే పరిస్థితి వస్తుందన్నారు. విద్యార్థులు కష్టపడి చదివి తల్లిదండ్రులతో పాటు రాష్ట్రానికి గర్వకారణంగా నిలువాలన్నారు.